Berekraftige sirkulære løysingar for å handtere plast i fiskeri- og havbrukssektoren

I prosjektet Shift-Plastics er målet betre handtering av

plast frå fiskeri og havbruk.

Fiske- og havbrukssektoren produserer mykje avfall på verdsbasis. I norsk samanheng står fiskeri- og havbrukssektoren for størstedelen av plastavfallet som hamnar i havet. Denne forureininga har alvorlege konsekvensar for natur og miljø, særleg fordi plasten blir broten ned til mikro- og nanoplast som fisk og dyr får i seg.

Desse problema er komplekse, og det finst ingen enkle løysingar. Forskingsprosjektet Shift-Plastics handlar om å få til betre handtering av avfall. Korleis bør vi til dømes handtere kassert utstyr som kombinerer fleire materiale, som tauverk med stålkjerne og kopar-impregnerte nøter?

Prosjektet er eit samarbeid mellom sju forskingsinstitusjonar med kompetanse innan teknologi, politikk og sirkulære verdikjeder. I tillegg kjem over 20 brukarpartnarar: utstyrsprodusentar, industri, gjenvinningsbransjen, offentlege verksemder og interesseorganisasjonar. Forskarane legg opp til tett samarbeid med styresmakter, interesseorganisasjonar og industri for å finne løysingar på miljøproblema knytt til plast frå fiskeri og havbruk.

Prosjektet er leia av Vestlandsforsking. Du kan lese meir på nettsidene til Forskningsrådet eller Vestlandsforsking.